маршрут, бағыт

(нем. marschrute, франц. marche — жүріс, алға жылжу және route – жол)

әскерлердің, теңіз күштерінің, авиацияның, көлік құралдарының күн ілгері белгіленген жүріп өту жолы немесе қозғалысының бағыты. М. картада жүріп өтетін негізгі пунктерді немесе азимутты көрсету арқылы белгіленеді. М-ты қозғалыс мақсаты мен қалыптасқан жағдайға байланысты аға бастық тағайындайды. Құрлықтағы әскерлердің жүріп өту М-ы қозғалыстың жасырын жетуі және жоғары жылдамдығын есепке ала отырып тағайындалады. Мүмкіндігінше ол ірі елді мекендерден, жол тораптарынан, тар жерлер мен темір жол станцияларына жақын өтпеуі керек. Көлденең маршруттар арасындағы қашықтықтар екі лектің бірдей орташа қуаттылықтағы ядролық оқ-дәрінің жарылысынан жойылып кетпеуін есепке ала отырып таңдалады. М. таңдағанда карталар, аэрофотосуреттер, әскери-географиялық сипаттамалар және жоғарғы штаб мәліметтері пайдаланылады. Сонымен қатар командир барлау мәліметтерін, жол жағдайын, өтуге қиын жерлерді, демалуға және тоқтауға қолайлы аудандарды, қарсыласпен кезіккен жағдайда жайылу шептерін есепке алады; жергілікті жердің бүркемелеу және қорғаныш қабілетін ескереді, жергілікті жерге қарсыластың ядролық және басқа да жаппай қырып-жоятын қаруды қолдануының әсерін бағалайды. Сондай-ақ ауа райының әсері, тәулік уақыты және жыл мезгілі есепке алынады. Авиацияда маршруттарды таңдау бағдарларды жабдықтау, қарсылас аумағынан жасырын және қауіпсіз ұшу, нысанаға кенеттен, дәл келу және тапсырманы орындаған соң ол жерден кету қажеттілігінен туады. Әскери-теңіз флотында маршруттар аймақтағы оперативтік жағдайды, навигациялық-гидрографикалық және гидрометеорологиялық жағдайларды және кемелердің ұрыс қимылдарының белгіленген ауданына уақытында келуін есепке алу арқылы таңдалады.